English
Første fangstskute på plass i isen
Selfangsten opnar 10. april og «Havsel» med inspektør frå Fiskeridirektoratet om bord er første fangstskute ved iskanten. Også «Kvitungen» har fått grønt lys og er på veg til feltet.
Årets selfangst kan berre føregå i Vestisen, nord for Island, og kvoten er på 7397 grønlandssel. Sjølve fangstinga kan først starte 10. april og må vere avslutta 30. juni.
Tilskot
Selfangst er ei krevande næring og med til dels utfordrande økonomi. Samstundes er det viktig at næringa kan bestå og skape mest mogeleg verdiar av fangsten. Det vert difor ytt tilskot til selfangsten. I år er dette tilskotet på 1,5 millionar kroner og ein aktør kan motta inntil ein million kroner. For å kunne motta grunntilskot må fartøyet ha fangsta i minst 35 døgn.
Også mottak som tar imot selskinn/selprodukt kan søke tilskot dersom dei har kjøpargodkjenning frå Fiskeridirektoratet og løyve frå Mattilsynet til å produsere selolje. I tillegg må mottaka ha fasilitetar for å kunne motta selskinn, selspekk og kjøtt.