Hummarteiner

Hummar kan berre fangstas med teiner som er tilpassa hummarfiske. Får du hummar med annan reiskap, må du setje hummaren tilbake i sjøen.

Som fritidsfiskar kan du bruke inntil 10 hummarteiner per person og per båt. Dersom fleire personar fiskar frå same båt, kan de til saman ikkje bruke meir enn 10 hummarteiner. Det same gjeld dersom éin person fiskar frå fleire båtar.

Brukar du både hummarteiner og andre teiner i hummarfiskeperioden, kan du berre fange hummar med hummarteinene.

Hugs: I Oslofjorden kan du bruke inntil 5 hummarteiner.

Det er ingen krav til minimumsdjupn for teiner i hummarfisket.

Ei hummarteine skal ha minst to sirkelforma fluktopningar - éi på kvar side av reiskapen. Fluktopningane må vere minst 60 millimeter og vere plasserte nede ved botnen, slik at hummar under minstemål lett kan ta seg ut. 

Hummarteiner har også krav om rømmingshol. Rømmingshol er løysingar som etter ei viss tid opnar seg og stoppar vidare fangst i ei tapt teine.

Sjå vår rettleiing til montering av rømmingshol i hummarteiner.

Som fritidsfiskar skal både vaket og kvar enkelt teine vere tydeleg merka med namn og adresse.

Når du fiskar hummar, skal vaket i tillegg vere merkt med deltakarnummeret ditt. Kvar teine skal vere merkt sjølv om du set fleire teiner i lenke.

Sanke- og samleteiner skal merkast på same måte.